Karibu uweze kusoma habari mbalimbali za michezo zilitokea katika juma lililoisha ambazo huwa zinarushwa na kituo cha redio cha 98.1 kwaneema fmkila jumapili kuanzia saa tisa alasiri kwenye kipindi cha MICHEZO JUMA HILI.Utakayo yasoma ni pamoja na

TFF YASIMAMISHA MCHEZAJI WA KAGERA SUGER,SIMBA WAMALIZANA NA ZIMBWE AMWAGA WINO,AZAM NAO WASAJILI WAWILI KUTOKA GHANA

 

BAADA ya malalamiko ya Panone Fc juu ya ushiriki wa mchezaji Christopher Mahanga katika Ligi ya TFF ya vijana wenye umri wa chini ya miaka 20 iliyoko Kundi A, Kituo cha Bukoba Shirikisho la Mpira wa Miguu Tanzania (TFF), limesimamisha ushiriki mchezaji Christopher Mshanga katika mashindano yanayoendelea mpaka uchunguzi wa suala lake utakapokamilika. 

Kamati ya Katiba, Sheria na Hadhi za wachezaji italifanyia kazi suala hilo na taarifa itatolewa.

Hatua ya TFF imekuja baada ya kuibuka malalamiko kutoka Panone ya Moshi Kilimanjaro kushangazwa na mchezaji huyo kuibukia timu ya Kagera ilihali akidaiwa kuwa na usajili katika timu hiyo kwa msimu wa pili mfululizo. 

Kwa haraka, Idara ya Mashindano ya TFF imebaini kuwa mchezaji huyo alikuwa na usajili kwa timu zote mbili kwa usajili wa majina tofauti ilihali picha ikionekana kuwa mmoja. 

Panone FC alisajiliwa kwa jina la Christopher Mshanga kuanzia msimu wa 2015/2016 na pia msimu wa 2016/17. 

Taarifa za awali ambazo TFF ingali ikizifanyia kazi zinasema kwamba baada ya kusajili Panone FC ya Moshi, akachezea timu mbili na kuaga kuwa amekwenda kutibiwa majeraha, lakini wakati anasubiriwa, amekuja kuonena kwenye mchezo ambao Kagera ilikuwa ikicheza na Yanga Africans kwenye ligi ya vijana wa U20 ya TFF. 

Kwa mbinu za kuchezea mtandao, mchezaji huyo pia akasajiliwa na Kagera Sugar msimu wa2016/17 na Kagera kwa jina la Christopher Paschal Peter Mshanga.

SIMBA, ZIMBWE JR WAMALIZANA SAFI, BABA YAKE, MENEJA WAKE WASHUHUDIA KILA KITU SAFI.

Uongozi wa Klabu ya Simba, umefikia makubaliano na beki wake, Mohamed Zimbwe Jr ambaye ni maarufu kama Tshabalala.

Hivi karibuni kumekuwa na taarifa kwamba Zimbwe ana mpango wa kujiunga na Yanga kwa kuwa mkataba wake na Simba umeisha.

Beki huyo jana alitua ofisi za Mwenyekiti wa Kamati ya Usajili ya Simba, Zacharia Hans Poppe akiwa ameongozana na meneja wake, Herry Mzozo.

Mazungumzo yao yalichukua kama dakika 25, baadaye Zimbwe Jr alitoka nje na baba yake alitoka nje kabla ya kurejea tena ndani na kumalizana.

Baada ya mazungumzo hayo, Hans Poppe alisema walikuwa wamemalizana kwa maana ya makubaliano na kila kitu.

“Sasa tumemalizana na Tshabalala, awali tulizungumza na leo ilikuwa ni kumalizia tu,” alisema Hans Poppe.

Baada ya suala la beki huyo wa kushoto, sasa ni suala la kiungo Jonas Mkude ambaye pia amekuwa akielezwa kwamba ana mpango wa kujiunga na Yanga, hata hivyo, Kamati ya Utendaji ya Simba inakutana leo Ijumaa kwa ajili ya kujadili masuala kadhaa lakini la usajili linaonekana kuwa namba moja.

  

NYOTA 2 ZA GHANA ZASAJILIWA AZAM FC!

 

UONGOZI wa Klabu Bingwa ya Afrika Mashariki na Kati Azam FC, unayofuraha kuwaataarifu wapenzi wa soka kuwa jioni ya leo umefanikiwa kuingia mikataba na wasshambuliaji nyota kutoka Ghana, Samuel Afful na Yahaya Mohammed.

Zoezi la kuingiana mikataba limehudhuria na baadhi ya viongozi wakuu wa timu wakiwemo Ofisa Mtendaji Mkuu, Saad Kawemba, Meneja Mkuu, Abdul Mohamed, Kocha Mkuu Zeben Hernandez pamoja na wakala anayewasimamia wachezaji hao, Kingsley Atakorah, ambaye pia ni Ofisa Mtendaji Mkuu wa Adom Wonders Academy ya nchini Ghana.

Wakati Afful, 20, akisaini mkataba wa miaka mitatu, Mohammed aliyetua nchini leo mchana akitokea Ghana naye amesaini kandarasi ya miaka miwili tayari kabisa kuanza kuitumikia timu hiyo yenye maskani yake Azam Complex, Chamazi, Dar es Salaam.

Afful ambaye mpaka sasa yumo katika vikosi vya timu za vijana za Ghana chini ya umri wa miaka 20 na 23, anajiunga Azam FC akitokea timu ya Sekondi Hasaacan ya Ghana, ambayo aliifungia mabao tisa timu hiyo msimu uliopita.

Moja ya rekodi yake ni kuifungia bao muhimu timu ya Taifa ya Ghana chini ya umri wa miaka 20 (U-20) mwaka jana dhidi ya Zambia kwenye ushindi wa mabao 2-1, lililoipa nafasi ya kushiriki fainali za Kombe la Dunia nchini New Zealand, baada ya kutinga nusu fainali ya Mataifa ya Afrika kwa Vijana (U-20) zilizofanyika Senegal mwaka jana.

Mohammed ambaye ni mshambuliaji mzoefu anayetokea Aduana Stars, alikuwa ni mfungaji bora namba mbili wa Ligi Kuu ya Ghana msimu uliopita akifunga mabao 15, pungufu ya mabao mawili na kinara Latif Blessing (Liberty Proffessional) aliyetupia 17.

Azam FC tunaamini ya kuwa ujio wa nyota hao, utazidi kuipa nguvu timu yetu kuelekea kwenye michuano inayotukabili mbeleni, mzunguko wa pili wa Ligi Kuu ya Vodacom Tanzania Bara (VPL), Kombe la Kagame (CECAFA Kagame Cup) tukiwa kama mabingwa watetezi, Kombe la Shirikisho (Azam Sports Federation Cup) na Kombe la Shirkisho Afrika (CC) mwakani.

Azam FC tunapenda kuwafahamisha mashabiki wetu kuwa tutaendelea kuyafanyia kazi mapendekezo ya benchi la ufundi kwa kukifanyia marekebisho kikosi chetu katika usajili huu wa dirisha dogo uliofunguliwa jana, lengo ni kukipa nguvu zaidi kikosi chetu bili kifanye vizuri zaidi katika michuano ya hapa nchini pamoja na ile ya Kimataifa.

Azam FC itaendelea kuwathamini mashabiki wake na tunaamini ya kuwa uwepo wenu utaendelea kutupa nguvu zaidi katika mapambano yetu makubwa ya kila siku na yaliyoko mbele yetu, tunachowaahidi ni kuendelea kuwapa furaha zaidi kwa kupata matokeo bora uwanjani na tunawaomba muendelee kuwa pamoja nasi.